प्रभु महालक्ष्मी लाइफको साधारणसभा जेठ २६ गते, हकप्रद सेयर प्रस्ताव रद्द
काठमाडौं । प्रभु महालक्ष्मी लाइफको आठौं वार्षिक साधारण सभा जेठ २६ गते बस्ने भएको छ । सभामा ८ प्रतिशत बोनस सेयर र कर प्रयोजनका लागि ०।४२१ प्रतिशत नगद लाभांश वितरण गर्ने प्रस्ताव पेश हुनेछ । कम्पनीले यसअघि सातौं वार्षिक साधारण सभाबाट निर्णय भएको ७ प्रतिशत हकप्रद सेयर प्रस्ताव भने रद्द गर्ने बताएको छ ।
प्रस्तावित बोनस सेयरबाटै नेपाल बीमा प्राधिकरणले तोकेको चुक्ता पुँजी कायम हुने भएका कारण हकप्रद प्रस्ताव रद्द गर्न लागिएको प्रभु महालक्ष्मीले जानकारी गराएको छ ।
बोनस सेयरबाट चुक्ता पुँजी वृद्धि हुने भएकाले सोही बमोजिम प्रबन्धपत्र संशोधन गर्ने, गत आर्थिक वर्षको वार्षिक प्रतिवेदन, नाफा नोक्सान हिसाब र नगद प्रवाह विवरण पनि छलफल गरी पारित गर्ने एजेन्डा छ ।
कम्पनीको साधारण सभा आम्रपाली बेंक्वेट, भाटभटेनी काठमाडौंमा बिहान ११ बजे बस्नेछ । कम्पनीले साधारण सभा प्रयोजनका लागि जेठ १६ गते बुक क्लोज गर्ने भएको छ ।
यसर्थ, उक्त दिनभन्दा अघिल्लो दिनसम्म कायम सेयरधनीहरुले मात्र सभामा भाग लिन र प्रस्तावित लाभांश पाउन सक्नेछन् । तर अघिल्लो दिन जेठ १५ गते गणतन्त्र दिवसका कारण सार्वजनिक विदा छ । यसकारण जेठ १४ गते बुधबारसम्म कायम सेयरधनीले मात्र लाभांश पाउन सक्नेछन् ।
