रास्वपा हाम्रो प्रतिस्पर्धी हो, दुश्मन होइन : गगन थापा
काठमाडौं । नेपाली कांग्रेसका सभापति गगनकुमार थापाले राष्ट्रिय स्वतन्त्र पार्टी (रास्वपा) आफ्नो पार्टीको प्रतिस्पर्धी भए पनि दुश्मन नभएको बताएका छन्। रास्वपाको प्रथम महाधिवेशनलाई सम्बोधन गर्दै उनले लोकतान्त्रिक राजनीतिमा स्वस्थ प्रतिस्पर्धामार्फत अगाडि बढ्नुपर्ने धारणा राखेका हुन्।
थापाले नेपाली कांग्रेस र रास्वपाबीच प्रतिस्पर्धा स्वाभाविक रहेको उल्लेख गर्दै कांग्रेस रास्वपाभन्दा अझ बलियो र प्रभावशाली बन्न चाहने बताए। तर, अर्को दललाई कमजोर बनाएर वा उसको खुट्टा तानेर आफूहरू अगाडि बढ्ने सोच कांग्रेसको नरहेको उनको भनाइ थियो।
उनले रास्वपाले स्थापना भएको छोटो अवधिमै हासिल गरेको जनसमर्थनलाई ‘लोभलाग्दो’ र ‘असाधारण’ संज्ञा दिए। पार्टी गठन भएको चार वर्षमै रास्वपाले प्राप्त गरेको जनमत नेपाली राजनीतिक इतिहासमा विरलै देखिएको उदाहरण भएको उल्लेख गर्दै त्यसका लागि पार्टी नेतृत्व र कार्यकर्तालाई बधाइ दिए।
थापाले इतिहासमा केही राजनीतिक दलहरूले छोटो समयमै ठूलो जनमत प्राप्त गरे पनि तीमध्ये अधिकांश विभिन्न कारणले दुर्घटनामा परेको स्मरण गराउँदै प्राप्त जनविश्वासलाई संस्थागत गर्नुपर्ने चुनौती र अवसर दुवै रहेको बताए।
उनले रास्वपाको संगठन निर्माणदेखि निर्वाचनमा हासिल गरेको सफलतासम्मको यात्राको प्रशंसा गर्दै पार्टी सभापति रवि लामिछानेको नेतृत्वको खुलेर सराहना गरे। साथै, उनले सम्बोधनका क्रममा काठमाडौं महानगरपालिकाका प्रमुख बालेन्द्र (बालेन) शाहको नाम पनि उल्लेख गर्दै नेतृत्वदायी भूमिकाको प्रशंसा गरेका थिए।
“पार्टी गठन भएको चार वर्षमै तपाईंहरूले जुन जनसमर्थन पाउनुभएको छ, यो लोभलाग्दो छ। म मुक्तकण्ठले प्रशंसा गर्दछु,” थापाले भने, “संगठन निर्माणदेखि निर्वाचनमा सफलता प्राप्त गर्ने यात्रामा पार्टी सभापति रवि लामिछाने र सम्माननीय प्रधानमन्त्री बालेन शाहले जुन कुशलतापूर्वक नेतृत्व गर्नुभएको छ र तपाईंहरूले जुन साथ दिनुभएको छ, तपाईंहरू सबै बधाइका पात्र हुनुहुन्छ।”
थापाले लोकतन्त्रमा राजनीतिक दलहरूबीच विचार, कार्यक्रम र कार्यशैलीका आधारमा प्रतिस्पर्धा हुनुपर्ने उल्लेख गर्दै रास्वपाको उचाइ देखेर आफूहरूलाई पनि अझ मेहनत गर्न प्रेरणा मिलेको बताए। उनले कांग्रेस रास्वपाभन्दा अग्लो बन्न चाहने तर त्यसका लागि रास्वपालाई होच्याउने वा कमजोर बनाउने बाटो नअपनाउने स्पष्ट पारे।
