सुस्त पुँजी बजारः वाणिज्य बैंकको शेयर मूल्यमा भने रौनक, यी कारण बढेको छैन मार्केट !

काठमाडौँ । दशैं नजिकिँदै जाँदा पनि नेपालको शेयर बजारमा अपेक्षित सुधार देखिन सकेको छैन । नेप्सेमा कारोबार सुस्त छ भने सूचकमा हुने सामान्य वृद्धिले पनि लगानीकर्ताको विश्वास जित्न सकेको छैन । लामो समयदेखि शेयरमूल्य घटेका कारण धेरै कम्पनीका शेयर तुलनात्मक रूपमा सस्तो देखिए पनि बजारमा नयाँ लगानीकर्ताको आकर्षण बढ्न सकेको छैन । खरिदबिक्रीको गतिविधि कमजोर हुँदा बजारले स्पष्ट गति लिन नसकेको अवस्था छ ।

बजारमा सुधार ल्याउने उद्देश्यले नेपाल राष्ट्र बैंक र नेपाल धितोपत्र बोर्डले नीतिगत तथा नियामकीय व्यवस्थामा विभिन्न पहल गरिरहेका छन्। राष्ट्र बैंकले शेयर कर्जासम्बन्धी केही व्यवस्थामा लचकता देखाएको छ भने धितोपत्र बोर्डले बजारलाई थप व्यवस्थित र विश्वसनीय बनाउने प्रयास गरिरहेको छ। यसैबीच, सूचीकृत कम्पनीहरूले गत आर्थिक वर्षको वित्तीय विवरण सार्वजनिक गर्दै लाभांश वितरणको तयारी पनि अघि बढाएका छन्। तर, आर्थिक अवस्था र बजारको भविष्यबारे कायम अनिश्चितताका कारण यी गतिविधिले लगानीकर्तालाई उत्साहित बनाउन सकेका छैनन्।

दशैंका लागि आवश्यक खर्च जुटाउन केही लगानीकर्ताले शेयर बिक्री गरिरहेको बजारका जानकारहरूको भनाइ छ। अर्कोतर्फ, बजारमा नयाँ पुँजीको प्रवेश अपेक्षाकृत कमजोर हुँदा बिक्रीको चाप व्यवस्थापन गर्न कठिन भएको छ। ठूला लगानीकर्ताको आर्थिक स्रोत तथा सम्पत्ति शुद्धीकरणसम्बन्धी विषयमा निगरानी बढ्दा उनीहरू थप सावधानी अपनाइरहेका छन्। त्यस्तै, बाढीपहिरोबाट हुने क्षतिको सम्भावित प्रभावले निर्जीवन बीमा र ऊर्जा क्षेत्रका कम्पनीप्रति लगानीकर्ताको चासो तथा जोखिम मूल्याङ्कनमा समेत असर पारेको छ।

हाल शेयर बजारमा तत्काल लगानी बढाउनुभन्दा परिस्थितिको मूल्याङ्कन गरेर मात्र निर्णय गर्ने प्रवृत्ति हाबी छ। पहिले नै बजारमा लगानी गरेका व्यक्तिहरू थप शेयर किन्ने वा आफ्नो पुँजी जोगाउने भन्ने द्विविधामा छन् भने नयाँ लगानीकर्ता पनि बजार स्थिर हुने प्रतीक्षामा छन्। शेयरमूल्य घट्दैमा बजारमा सुधार सुरु भएको मान्न नसकिने भएकाले लगानीकर्ताले कारोबार रकम, कम्पनीहरूको वित्तीय अवस्था र बजारको समग्र प्रवृत्तिलाई नजिकबाट नियालिरहेका छन्। आगामी दिनमा खरिद माग बढ्नु, लगानीकर्ताको मनोबल सुधार हुनु र बजारमा सकारात्मक संकेत देखिनु आवश्यक छ। अन्यथा, नेप्सेमा जारी सुस्तता र ‘पर्ख र हेर’को अवस्था अझै लम्बिन सक्ने देखिन्छ।

नेपाल स्टक एक्सचेञ्ज (नेप्से) ४.१२ अकंले बढेर २५९९.९३ बिन्दुमा कायम भएको छ । आज ३५१ कम्पनीको १ करोड ३५ लाख ५३ हजार कित्ता शेयर किनबेच हुँदा ४ अर्ब ७३ करोडको शेयर कारोबार भएको हो ।

यसदिन ८ उपसूचक राताम्य भएका छन् भने ५ उपसूचकमा सुधार देखिएको छ । वाणिज्य बैंकको शेयर मूल्यमा निरन्तर सुधार देखि रहेको हो । हिजो उच्च अकंले बढेको वाणिज्य बैंकको शेयर मूल्य आज पनि ०.६९ प्रतिशतले बढेको छ ।

मंगलबार १०४ कम्पनीको शेयर मूल्य बढेको छ भने १६७ कम्पनीको घटेको छ । ७ कम्पनीको शेयर मूल्य भने स्थिर रहेको हो ।