लाभांश पारित गर्न एनएमबि बैंकले बोलायो साधारणसभा, बुक क्लोज कहिले?
काठमाडौं । एनएमबि बैंक लिमिटेडले गत आर्थिक वर्ष २०८२/८३ को मुनाफाबाट आफ्ना साधारण शेयरधनीलाई ७ प्रतिशत नगद लाभांश वितरण गर्ने प्रस्ताव गरेको छ। बैंकले उक्त प्रस्ताव पारित गर्न आगामी मंसिर २५ गते शुक्रबार ३१औँ वार्षिक साधारण सभा बोलाएको छ।
बैंकको मंसिर २० गते शुक्रबार बसेको सञ्चालक समितिको ५१९औँ बैठकले वार्षिक साधारण सभा गर्ने तथा लाभांश वितरणसम्बन्धी प्रस्ताव अघि बढाउने निर्णय गरेको हो।
प्रस्तावअनुसार बैंकले साधारण शेयरधनीलाई चुक्ता पुँजीको ७ प्रतिशतका दरले कुल १ अर्ब ३४ करोड ९९ लाख ५२ हजार ८८८ रुपैयाँ नगद लाभांश वितरण गर्नेछ। उक्त लाभांशमा कर प्रयोजनका लागि आवश्यक रकमसमेत समावेश छ।
त्यस्तै बैंकले ८.२५ प्रतिशत अविमोच्य असञ्चिति अग्राधिकार शेयरधनीलाई समेत ८.२५ प्रतिशतका दरले नगद लाभांश वितरण गर्ने प्रस्ताव गरेको छ। यसबापत कुल १२ करोड २० लाख ५४ हजार ७९४ रुपैयाँ ५२ पैसा वितरण गरिनेछ। उक्त लाभांश शेयर बाँडफाँड भएको मितिदेखि २०८३ असार मसान्तसम्मको अवधिका लागि १८० दिनको समानुपातिक हिसाबले गणना गरिएको बैंकले जनाएको छ।
बैंकले साधारण सभा तथा प्रस्तावित नगद लाभांश वितरण प्रयोजनका लागि मंसिर ११ गते एक दिन शेयर दाखिल खारेज (बुक क्लोज) गर्ने निर्णय गरेको छ। त्यसअनुसार मंसिर १० गतेसम्म कायम शेयरधनीले साधारण सभामा सहभागी हुन तथा प्रस्तावित लाभांश प्राप्त गर्न सक्नेछन्।
वार्षिक साधारण सभामा आर्थिक वर्ष २०८२/८३ को सञ्चालक समितिको वार्षिक प्रतिवेदन र लेखापरीक्षकको प्रतिवेदनसहितको वार्षिक वित्तीय विवरण पारित गर्ने प्रस्ताव रहेको छ। त्यसैगरी आगामी आर्थिक वर्ष २०८३/८४ का लागि लेखापरीक्षक नियुक्त गर्ने र निजको पारिश्रमिक निर्धारण गर्ने प्रस्ताव पनि सभामा पेस हुनेछ।
सभाले एनएमबि क्यापिटल लिमिटेड, एनएमबि लघुवित्त वित्तीय संस्था लिमिटेड र एनएमबि सेक्युरिटिज लिमिटेडसमेत समेटिएको बैंकको एकीकृत वित्तीय विवरण पारित गर्नेछ।
