वाणिज्य विभागको छापाः दुई फर्मलाई जरिवाना, चारलाई ३ दिनको अल्टिमेटम
काठमाडौँ । काठमाडौँमा बजार अनुगमनलाई तीव्रता दिँदै आएको वाणिज्य, आपूर्ति तथा उपभोक्ता संरक्षण विभाग ले आइतबार दुई फर्मलाई जरिवाना गरेको छ। उपभोक्ताको हित संरक्षण र बजारमा अनुशासन कायम गर्ने उद्देश्यले गरिएको स्थलगत अनुगमनका क्रममा कैफियत फेला परेपछि विभागले कारबाही अघि बढाएको जनाएको छ।
अनुगमनका क्रममा काठमाडौँको बाँसबारीस्थित बाँसबारी राइस मिलमा कानुनविपरीत गतिविधि देखिएपछि रु दुई लाख जरिवाना तिराइएको विभागले जानकारी दिएको छ। उत्पादन तथा बिक्री प्रक्रियामा उपभोक्ता संरक्षणसम्बन्धी मापदण्ड पालना नभएको पाइएपछि कडा कारबाही गरिएको विभागको भनाइ छ।
त्यसैगरी कागेश्वरी मनोहरा नगरपालिका–६, मुलपानी बाबाचोकस्थित जयस अन्न घरलाई रु १० हजार जरिवाना गरिएको छ। सामान्य प्रकृतिको उल्लंघन भए पनि कानुनी दायराभित्र ल्याउन जरिवाना गरिएको विभागले स्पष्ट पारेको छ। दुवै फर्मलाई उपभोक्ता संरक्षण ऐन, २०७५ को दफा १६ बमोजिमको कसुरमा सोही ऐनको दफा ३९ अनुसार कारबाही गरिएको जनाइएको छ।
अनुगमनका क्रममा कागजात अपूरो वा शंकास्पद देखिएका कारण मेगा मार्ट प्रालिलगायत अन्य तीन फर्मलाई तीन दिनभित्र व्यवसायसँग सम्बन्धित सम्पूर्ण कागजातसहित विभागमा उपस्थित हुन निर्देशन दिइएको छ। तोकिएको समयसीमाभित्र उपस्थित नभए थप कारबाही गरिने चेतावनीसमेत विभागले दिएको छ।
यस्तै, अन्य सात वटा फर्मलाई तत्काल सुधार गर्न निर्देशन दिइएको छ। मूल्यसूची स्पष्ट रूपमा प्रदर्शन गर्न, बिल अनिवार्य जारी गर्न, म्याद गुज्रिएका वस्तु बिक्री नगर्न र लेबलिङसम्बन्धी मापदण्ड कडाइका साथ पालना गर्न लिखित निर्देशन दिइएको विभागले जनाएको छ।
