फर्स्ट माइक्रोफाइनान्सको शेयर लिलामीमा, प्रतिकित्ता मूल्य कति?
काठमाडौं । फर्स्ट माइक्रोफाइनान्स लघुवित्त वित्तीय संस्था लिमिटेडले संस्थापक समूहको प्रतिकित्ता १०० रुपैयाँ अंकित मूल्यका १ लाख ८६ हजार ४३३ कित्ता शेयर लिलामीमा राखेको छ।
कम्पनीले सबैले किन्न पाउने गरी उक्त शेयर लिलामीमा राखेको हो। शेयरको बिक्रीमूल्य प्रतिकित्ता न्यूनतम २८० रुपैयाँ तोकिएको छ। शेयर खरीदका लागि बोलपत्र पेश गर्दा न्यूनतम १ लाख कित्ताका लागि र अधिकतममा १० अंकको गुणाङ्कमा वा सम्पूर्ण कित्ता दाबी गर्न सकिनेछ।
शेयर खरीद गर्न इच्छुकले आफूले किन्न चाहेको शेयर संख्या र दर रेट समेत खुलाएर काठमाडौंको नक्सालस्थित मुक्तिनाथ क्यापिटल लिमिटेड (बिक्री प्रबन्धक) को कार्यालयमा गोप्य शिलबन्दी बोलपत्र पेश गर्नु पर्नेछ। त्यस्तो बोलपत्र पनि सोही कार्यालयमा पाइँनेछ।
बोलपत्र आज फागुन २६ गतेदेखि चैत १० गते दिउँसो ३ बजेभित्र पेश गरिसक्नु पर्नेछ। प्राप्त बोलपत्रहरू चैत ११ गते बिहान ११ बजे क्यापिटलको कार्यालयमा खोलिने कम्पनीले जानकारी दिएको छ।
