इरानका तीन शर्तबिना युद्ध अन्त्य नहुने चेतावनी, अमेरिका र इजरायलसँगको संघर्ष झन् चर्कियो

काठमाडौँ ।  इरानले अमेरिका र इजरायलसँग जारी युद्ध अन्त्य गर्न तीन प्रमुख शर्त अघि सारेको छ। युद्ध तेह्रौँ दिनमा प्रवेश गरिरहँदा तेहरानले आफ्नो अधिकारको अन्तर्राष्ट्रिय मान्यता, युद्धबाट भएको क्षतिको क्षतिपूर्ति र भविष्यमा आक्रमण नहुने कडा अन्तर्राष्ट्रिय ग्यारेन्टी नभएसम्म संघर्ष रोक्न नसकिने स्पष्ट पारेको छ।

इरानका राष्ट्रपति मसुद पेजेस्कियान ले सामाजिक सञ्जाल एक्समार्फत रुस र पाकिस्तानका नेतासँग भएको कुराकानीपछि आफ्नो देश शान्तिप्रति प्रतिबद्ध रहेको बताएका छन्। उनका अनुसार ‘यहुदी शासन र अमेरिकाले भड्काएको’ यो युद्ध अन्त्य गर्ने एक मात्र उपाय भनेको इरानका वैध अधिकारलाई अन्तर्राष्ट्रिय रूपमा स्वीकार गर्नु, युद्धबाट भएको क्षतिको क्षतिपूर्ति उपलब्ध गराउनु र भविष्यमा इरानमाथि आक्रमण नहुने ग्यारेन्टी दिनु हो।

फेब्रुअरी २८ मा संयुक्त राज्य अमेरिका र इजरायल ले इरान माथि संयुक्त आक्रमण गरेपछि युद्ध सुरु भएको थियो। सो आक्रमणमा इरानका सर्वोच्च नेता अयातुल्ला सैयद अली खामेनी, उच्च सैन्य कमान्डरहरू तथा सर्वसाधारणको मृत्यु भएको थियो। त्यसपछि इस्लामिक रिभोलुसनरी गार्ड कर्प्स ले इजरायलका विभिन्न स्थानलाई लक्षित गर्दै प्रतिआक्रमण सुरु गरेको घोषणा गरेको थियो।

संयुक्त राष्ट्रसंघ का लागि इरानका स्थायी प्रतिनिधि अमिर–सइद इरवानी का अनुसार फेब्रुअरी २८ यता अमेरिकी र इजरायली सैन्य कारबाहीका कारण महिला तथा बालबालिकासहित कम्तीमा एक हजार ३४८ सर्वसाधारणको मृत्यु भएको छ भने १७ हजारभन्दा बढी घाइते भएका छन्।

यसबीच संयुक्त राष्ट्र सुरक्षा परिषद् ले खाडी सहयोग परिषद् देशहरू र जोर्डनमाथि इरानले गरेको आक्रमणको निन्दा गर्दै प्रस्ताव पारित गरेको छ। १५ सदस्यीय परिषद्मा प्रस्तुत उक्त प्रस्ताव १३–० मतले पारित भएको थियो। प्रस्तावलाई बहराइन ले नेतृत्व गरेको थियो र १३० भन्दा बढी देशले सह–प्रायोजन गरेका थिए, जसमा भारत पनि समावेश छ। चीन र रुस मतदानमा सहभागी भएनन्।

प्रस्तावमा बहराइन, कुवेत, ओमान, कतार, साउदी अरेबिया, संयुक्त अरब इमिरेट्स र जोर्डन माथि इरानले गरेको आक्रमणलाई अन्तर्राष्ट्रिय कानूनको उल्लंघन भन्दै कडा शब्दमा निन्दा गरिएको छ। साथै होर्मुज जलडमरूमध्य बन्द गर्ने इरानी चेतावनीप्रति पनि गम्भीर चिन्ता व्यक्त गरिएको छ।

यसै क्रममा इराक को सुरक्षा मिडिया सेलका प्रमुख साद मान का अनुसार इराकको तट नजिक दुई तेल ट्यांकरमा आक्रमण भएको छ। उक्त घटनामा ३८ जना चालक दलका सदस्यलाई उद्धार गरिएको छ भने एक जनाको मृत्यु भएको पुष्टि गरिएको छ।

उता इस्लामिक रिभोलुसनरी गार्ड्स कर्प्सले ‘अपरेसन ट्रु प्रोमिस–४’ को ४०औँ चरण सुरु भएको घोषणा गरेको छ। इरानको मेहर समाचार एजेन्सीका अनुसार यसअन्तर्गत अमेरिकी सैन्य आधार, तेल अभिव र हाइफा क्षेत्रमा विभिन्न मिसाइल प्रहार गरिएको दाबी गरिएको छ। ‘गदर’, ‘इमाद’, ‘खेबर शेकान’ र ‘फताह’ नामका मिसाइल प्रयोग गरिएको बताइएको छ।

इरानले खाडी क्षेत्रका तेल ट्यांकरहरूमा आक्रमण गरेको तथा होर्मुज जलडमरूमध्य बन्द गर्ने चेतावनी दिएपछि विश्व ऊर्जा आपूर्तिमा असर परेको छ। यसका कारण अन्तर्राष्ट्रिय बजारमा कच्चा तेलको मूल्य बढेको बताइएको छ।

इरानको राज्य सञ्चारमाध्यम प्रेस टिभीले सार्वजनिक गरेको भिडियोमा पर्सियन खाडी र होर्मुज जलडमरूमध्य क्षेत्रमा जहाजहरूको गतिविधि कडाइका साथ निगरानी भइरहेको देखाइएको छ। उक्त दृश्यमा इरानी सुरक्षा बलका स्पिडबोटहरू सक्रिय रहेको र सानो गतिविधि भए पनि जहाजहरू लक्ष्य बन्न सक्ने चेतावनी दिइएको देखिन्छ।

अमेरिकी पत्रिका न्युयोर्क टाइम्स का अनुसार इरानको प्रतिआक्रमणले पश्चिम एसियाभर रहेका कम्तीमा १७ अमेरिकी सैन्य आधार तथा अन्य संरचनामा क्षति पुर्‍याएको छ। स्याटेलाइट तस्बिर, सामाजिक सञ्जाल भिडियो, अमेरिकी अधिकारीहरूको भनाइ र इरानी राज्य सञ्चारमाध्यमका रिपोर्टहरूको विश्लेषणपछि यस्तो निष्कर्ष निकालिएको हो।

बहराइन, जोर्डन, कतार, कुवेत, संयुक्त अरब इमिरेट्स र साउदी अरेबिया मा रहेका अमेरिकी आधारहरू पनि आक्रमणको निशानामा परेको बताइएको छ। तीमध्ये अमेरिकी थाड मिसाइल रक्षा प्रणालीका रडारहरू सबैभन्दा महँगो क्षति भएको उल्लेख गरिएको छ। साथै इराक, कुवेत, संयुक्त अरब इमिरेट्स र साउदी अरेबिया मा रहेका अमेरिकी कूटनीतिक नियोगहरूमा पनि आक्रमण भएको जनाइएको छ।