प्रतिकुल मौसमले हवाई उडान प्रभावित
काठमाडौँ । हावाहुरी, असिना र मेघगर्जनसहितको वर्षाले देशका प्रमुख विमानस्थलहरू प्रभावित बनेका छन् । विशेषगरी त्रिभुवन अन्तर्राष्ट्रिय विमानस्थलमा प्रतिकूल मौसमका कारण हवाई उडान तथा अवतरणमा गम्भीर अवरोध देखिएको छ ।
मौसम एक्कासि बिग्रिएपछि आकाशमार्गको दृश्यता घट्नुका साथै अवतरण प्रक्रियामा कठिनाइ उत्पन्न हुँदा अधिकांश जहाजले सुरक्षित अवतरण गर्न सकेनन् । विमानस्थल प्राविधिक रूपमा सञ्चालनमा रहे पनि मौसमको जोखिमका कारण उडान व्यवस्थापनमा चुनौती थपिएको हो ।
विदेशबाट काठमाडौँतर्फ आएका जहाजहरू समेत समस्यामा परेका छन् । भारतबाट उडेको एक अन्तर्राष्ट्रिय उडान अवतरण असम्भव भएपछि लखनउतर्फ मोडिएको छ भने कतारबाट आएको अर्को जहाज काठमाडौँको आकाशमा घुमिरहेकै अवस्थामा रहेको जनाइएको छ । मौसममा शीघ्र सुधार नआए त्यसलाई पनि वैकल्पिक गन्तव्यतर्फ पठाउनुपर्ने सम्भावना रहेको छ ।
आन्तरिक उडानहरू झन् बढी प्रभावित बनेका छन् । काठमाडौँ आउन उडेका विभिन्न सहरका जहाजहरू गन्तव्यसम्म पुग्न नसकी पुनः उडेकै स्थानमा फर्किन बाध्य भएका छन् । विराटनगर, सिमरा, धनगढी र भैरहवाबाट उडेका उडानहरू बीचमै रोकिनु वा फर्किनु परेको छ ।
हाल विमानस्थल क्षेत्रमा दृश्यता केही हदसम्म कायम भए पनि निरन्तर वर्षा र मेघगर्जनका कारण अवतरणको अन्तिम चरण जोखिमपूर्ण बनेको छ । विशेषगरी दक्षिण दिशातर्फको मौसम अत्यधिक बिग्रिँदा जहाजहरूले धावनमार्ग समात्न नसक्ने अवस्था देखिएको छ ।
हवाई सुरक्षालाई प्राथमिकतामा राख्दै पाइलटहरूले जोखिम नलिने निर्णय गरेका छन् । प्रत्येक उडानका लागि निर्धारित कार्यविधि अनुसार मौसम प्रतिकूल देखिएमा अवतरण नगरी वैकल्पिक उपाय अपनाइने भएकाले यात्रुहरूले असहजता भोग्नुपरेको छ । अहिलेको अवस्थाले मौसम अनुकूल नभएसम्म उडान नियमित हुन कठिन देखिएको छ ।
