महान्यायाधिवक्ता सविता भण्डारीले दिइन् राजीनामा
काठमाडौँ । महान्यायाधिवक्ता सविता भण्डारीले पदबाट राजीनामा दिएकी छन् । प्रधानमन्त्रीसमक्ष राजीनामा बुझाएकी उनले औपचारिक रूपमा जिम्मेवारीबाट अलग हुने निर्णय गरेसँगै अब नयाँ महान्यायाधिवक्ता नियुक्तिको प्रक्रिया अघि बढ्ने भएको छ । राजीनामाको कारण भने सार्वजनिक गरिएको छैन।
पछिल्लो समय विभिन्न कानुनी निर्णयका कारण भण्डारी आलोचनाको केन्द्रमा थिइन् । विशेषगरी केही चर्चित मुद्दामा सरकारी अभियोजन नगर्ने, अभियोग घटाउने वा मुद्दा फिर्ता लिने निर्णयले उनको भूमिकामाथि प्रश्न उठेको थियो । यसले कानुनी प्रणालीको निष्पक्षता र सरकारी हस्तक्षेपबारे बहस तीव्र बनाएको थियो।
संवैधानिक व्यवस्थाअनुसार महान्यायाधिवक्ता सरकारको प्रमुख कानुनी सल्लाहकार हुने पद हो । प्रधानमन्त्रीको सिफारिसमा राष्ट्रपतिबाट नियुक्त हुने यस पदले सरकारका तर्फबाट अदालतमा बहस गर्ने तथा मुद्दा चलाउने वा नचलाउने अन्तिम निर्णय गर्ने अधिकार राख्छ ।
