तेस्रो त्रैमाससम्मको नबिल बैंकको नाफा ६ अर्ब ७६ करोड, अधिकांश सूचकमा लोभलाग्दो प्रगति
काठमाडौँ । नबिल बैंकले चालु आर्थिक वर्ष २०८२।०८३ को तेस्रो त्रैमाससम्मको वित्तीय विवरण सार्वजनिक गरेको छ । सार्वजनिक विवरण अनुसार बैंकको नाफासहित अधिकांश सूचकमा लोभलाग्दो सुधार देखिएको हो ।
चालु आर्थिक वर्षको ९ महिनामा बैंकको नाफा ६ अर्ब ७६ करोड ४६ लाख ४६ हजार रुपैयाँ पुगेको छ। गत आर्थिक वर्षको सोहि अवधिमा बैंकको नाफा ५ अर्ब ५ करोड १४ लाख रुपैयाँ रहेको थियो।
बैंकको खुद ब्याज आम्दानी समिक्षा अवधिमा ३.३६ प्रतिशतले बढेर १२ अर्ब ४५ करोड ९४ लाख रुपैयाँ पुगेको छ । गत आर्थिक वर्षको सोहि अवधिमा बैकको उक्त आम्दानी १२ अर्ब ५ करोड ४४ लाख रुपैयाँ रहेको थियो ।
तेस्रो त्रैमाससम्मको अवधिमा बैंकको सञ्चालन नाफा ७ अर्ब ६२ करोड रुपैयाँबा बढेर ९ अर्ब ६१ करोड रुपैयाँ पुगेको छ ।
समिक्षा अवधिमा बैंकको चुक्तापूँजी २७ अर्ब ५ करोडबाट बढेर ३२ अर्ब ५ करोड पुगेको छ भने जगेडा कोष ३१ अर्ब ६२ करोडबाट बढेर ३४ अर्ब ४० करोड रुपैयाँ पुगेको हो ।
यता, बैंकको वितरणयोग्य नाफा समेत २ अर्ब ८७ करोड रुपैयाँबाट बढेर ४ अर्ब ३७ करोड रुपैयाँ पुगेको छ । बैंकको खराब कर्जा ४.९६ प्रतिशत बाट घटेर ३.३७ प्रतिशतमा सीमित बनेको छ ।
चैत मसान्तसम्मको अवधिमा बैंकको प्रतिशेयर आम्दानी ३३.०२ रुपैयाँ रहेको छ भने प्रतिशेयर नेटवर्थ २४३.३० रुपैयाँ पुगेको छ ।
