फास्ट ट्रयाकको बीमामा प्राइस कटिङ, सलिकोलाई दुई लाख रुपैयाँ जरिवाना
काठमाडौं । नेपाली सेनाले निर्माण गरिरहेको फास्ट ट्रयाकको बीमा पोलिसी जारी गर्दा बीमा कम्पनीहरुले नैतिकता गुमाउन पुगेका छन् । देशकै ठूलो राष्ट्रिय गौरवका आयोजना फास्ट ट्रयाकमा करोडौं रुपैयाँ बीमा प्रिमियम आउने भएपछि प्राइस कटिङ गरेर बीमा हत्याउने होडबाजी नै चलेको तथ्य बीमा प्राधिकरणले गरेको छानविनको क्रममा भेटिएको छ ।
बीमा पोलिसी जारी गर्दा तोकिएको शुल्क लिनुपर्नेमा गैर कानुनी रुपमा शुल्क घटाएर लिई प्राईस कटिङ धन्दामा संलग्न भएको तथ्य भेटिएपछि सगरमाथा लुम्बिनी इन्स्योरेन्स कम्पनी (सलिको) लाई नियामक बीमा प्राधिकरणले दुई लाख रुपैयाँ जरिवना तिराउने भएको छ ।
प्राधिकरणले सलिकोलाई फास्ट ट्रयाकको बीमा गर्दा तोकिएको शुल्क भन्दा लिई प्राइस कटिङ गरेको आरोपमा सो जरिवना तिराउने भएको हो । फास्ट ट्रयाकको बीमामा अन्य बीमा कम्पनीहरुले पनि प्राइस कटिङ गरेका थिए ।
स्रोतका अनुसार एनएलजी इन्स्योरेन्स कम्पनी, नेको इन्स्योरेन्स कम्पनी, राष्ट्रिय बीमा कम्पनी, सिद्धार्थ प्रिमियर इन्स्योरेन्स कम्पनीलाई बीमा प्राधिकरणले कारवाहीको दायरामा ल्याउँदैछ ।
