सरकार परिवर्तनपछि पनि नथामिएको बजारको गिरावटः डुब्दै लगानीकर्ता लगानी, त्रसित छ वातावरण !

काठमाडौं । नेपालको सेयर बजार पछिल्ला महिनाहरूमा निरन्तर ओरालो यात्रामा रहँदा लगानीकर्तामा गहिरो निराशा छाएको छ । राजनीतिक परिवर्तन र नयाँ सरकारप्रति सुरुमा बनेको अपेक्षा विपरीत बजार सूचकांक लगातार कमजोर बन्दै गएपछि समग्र पूँजी बजारको मनोबल खस्किँदै गएको देखिन्छ । दैनिक कारोबार रकममा आएको गिरावटले समेत बजारमा उत्साह हराउँदै गएको संकेत गरेको छ ।

बालेन शाह नेतृत्वको सरकार गठनपछि सेयर बजारमा केही सुधार आउने आशा गरिएको थियो । तर व्यवहारमा बजारले त्यसअनुसारको सकारात्मक प्रतिक्रिया दिन नसक्दा लगानीकर्ताको विश्वास क्रमशः कमजोर बन्दै गएको छ । सरकार र नियामक निकायहरूले बजार सुधारका लागि विभिन्न नीतिगत तथा प्राविधिक पहल गरे पनि त्यसको प्रभाव तत्काल देखिन नसक्दा बजार स्थायित्व पाउन सकेको छैन ।

विशेषगरी ठूला लगानीकर्ताहरूको बजारबाट क्रमशः बाहिरिने प्रवृत्तिले पनि बजारमा दबाब थपेको छ । जोखिम बढेको अनुभूति गर्दै धेरै लगानीकर्ताले नाफा सुरक्षित गर्न बिक्रीतर्फ लाग्दा सेयर आपूर्ति बढेको छ । यसले मूल्यमा निरन्तर गिरावट ल्याउँदै बजारलाई थप अस्थिर बनाएको छ । बजारमा दीर्घकालीन लगानीभन्दा पनि छोटो समयको नाफा सुरक्षित गर्ने प्रवृत्ति बलियो बन्दै गएको छ ।

यता, पछिल्लो समय नीतिगत अस्पष्टता र करसम्बन्धी अनिश्चितताले पनि बजारमा दबाब सिर्जना गरेको छ । विशेषगरी पुँजीगत लाभकरको दर, सीमा र कार्यान्वयन प्रक्रियाबारे स्पष्टता नहुँदा लगानीकर्तामा अन्योल बढेको छ । यसले बजारमा नयाँ लगानी भित्रिने गति सुस्त बनाएको छ भने विद्यमान लगानीकर्ताले समेत जोखिम न्यूनीकरणको रणनीति अपनाउन थालेका छन् ।

त्यसैगरी, बजार नियामक निकायहरूको सम्भावित कडाइ र अनुसन्धानसम्बन्धी गतिविधिले पनि लगानीकर्तामा मनोवैज्ञानिक दबाब थपेको छ । केही ठूला व्यवसायी पक्राउ परेपछि बजारमा असुरक्षाको भावना फैलिएको विश्लेषकहरूको भनाइ छ । यसले समग्र लगानी वातावरणलाई प्रभावित बनाउँदै कारोबार रकम घटाएको र बजारको दिशा अनिश्चित बनाएको छ ।

विश्लेषकहरूले स्पष्ट नीतिगत स्थायित्व, पारदर्शी कर प्रणाली र लगानीमैत्री वातावरण बिना बजारले दीर्घकालीन सुधारको बाटो समात्न कठिन हुने चेतावनी दिएका छन् । हालको अवस्थामा विश्वास पुनःस्थापना हुन नसके बजारमा दबाब अझै केही समय कायम रहने सम्भावना देखिन्छ ।

नेपाल स्टक एक्सचेञ्ज (नेप्से) १२.२६ अकंले घटेर २७११.७६ बिन्दुमा कायम भएको छ । आज ३५० कम्पनीको १ करोड ७ लाख ३९ हजार कित्ता शेयर किनबेच हुँदा ४ अर्ब ४१ करोड २० लाख रुपैयाँको कारोबार भएको हो ।

यसदिन १२ उपसूचक राताम्य भएको छ । आज फाइनान्स समूहको १.२६ प्रतिशत, विकास बैंक समूहको ०.५४ प्रतिशतले शेयर मूल्य घटेको छ ।

सोमबार ७३ कम्पनीको शेयर मूल्य बढेको छ भने १८८ कम्पनीको घटेको छ । १२ कम्पनीको शेयर मूल्य स्थिर रहेको हो ।