रोयल इन्फिल्डको एसेम्बली सुरु भएपछि बजार विस्तार आक्रामक, ९ महिनामै टीजी अटोको व्यापार ४ अर्ब

काठमाडौँ । नेपालमा रोयल इन्फिल्ड मोटरसाइकलको एसेम्बली उत्पादन सुरु भएपछि टिजि अटो ग्रुपले ९ महिनामा नै ४ अर्ब रुपैयाँको व्यापार गरेको छ । रोयल इन्फिल्ड मोटरसाइकल एसेम्बली गर्दै आएको त्रिवेणी समूहअन्तर्गतको कम्पनीले गत आर्थिक वर्ष २०८२।०८३ को चैत मसान्तसम्मको अवधिमा ४ अर्ब १० लाख रुपैयाँको कुल सञ्चालन आम्दानी गरेको हो । कम्पनीले २०८० जेठदेखि रोयल इन्फिल्डको एसेम्बली सुरु गरेको हो ।

एसेम्बली सुरु गरेदेखि कम्पनीको व्यापार विस्तार भइरहेको छ भने बजारको दायरा समेत बढ्दै गएको देखिएको छ ।  यसअघि आर्थिक वर्ष २०८१/८२ मा कम्पनीको कुल सञ्चालन आम्दानी ३ अर्ब ७४ करोड ४० लाख रुपैयाँ रहेको थियो भने आर्थिक वर्ष २०८०/८१ मा २ अर्ब ९६ करोड ९० लाख रुपैयाँको कारोबार गरेको थियो। चालु आर्थिक वर्षको नौ महिनामै अघिल्लो वर्षको कुल कारोबारलाई उछिन्ने अवस्थामा पुगेको कम्पनीले सञ्चालन नाफामा समेत उल्लेखनीय सुधार हासिल गरेको छ।

कम्पनीको ब्याज, मूल्यह्रास तथा कर कटाउनुअघि प्राप्त सञ्चालन नाफाको अनुपात (ईबिआइटिडिए मार्जिन) आर्थिक वर्ष २०८२/८३ को पहिलो नौ महिनामा ८.४८ प्रतिशत पुगेको छ। अघिल्लो आर्थिक वर्षमा यो अनुपात ६.५७ प्रतिशत मात्रै थियो। बिक्री गरिएका वस्तुको लागत घटेका कारण सञ्चालन नाफामा सुधार आएको कम्पनीको वित्तीय विवरणले देखाएको छ।

नाफासँगै कम्पनीको नगद प्रवाह पनि सुदृढ बनेको छ। चालु आर्थिक वर्षको पहिलो नौ महिनाको अन्त्यसम्म कम्पनीको कुल नगद सञ्चिति २६ करोड ७० लाख रुपैयाँ पुगेको छ, जबकि आर्थिक वर्ष २०८१/८२ को अन्त्यसम्म यो १९ करोड ७० लाख रुपैयाँ मात्रै थियो।

त्यसैगरी कम्पनीले आफ्नो ऋण भार पनि उल्लेखनीय रूपमा घटाएको छ। आर्थिक वर्ष २०८२/८३ को पहिलो नौ महिनाको अन्त्यसम्म कम्पनीको कुल ऋण–पुँजी अनुपात ०.१२ गुणामा झरेको छ। अघिल्लो आर्थिक वर्षको अन्त्यमा यो अनुपात १.६३ गुणा रहेको थियो। कम्पनीले आर्जन गरेको नाफा सञ्चित कोषमा थपिँदै जानु र कुल ऋणको मात्रा घट्नु यस सुधारका प्रमुख कारण मानिएको छ।

कम्पनीको ब्याज भुक्तानी गर्ने क्षमता पनि थप सुदृढ भएको छ। ब्याज भुक्तानी वहन क्षमता अनुपात चालु आर्थिक वर्षको पहिलो नौ महिनामा २५.७३ गुणा पुगेको छ, जुन अघिल्लो आर्थिक वर्षमा १९.९९ गुणा थियो। सञ्चालन नाफामा भएको वृद्धिले ब्याज तिर्ने क्षमता उल्लेखनीय रूपमा बढाएको देखिन्छ।

त्यसैगरी कुल ऋण र कुल नगद सञ्चिति (सकल नगद प्राप्ति) बीचको अनुपात पनि निकै सहज अवस्थामा पुगेको छ। आर्थिक वर्ष २०८२/८३ को पहिलो नौ महिनाको अन्त्यमा यो अनुपात ०.१६ गुणा रहेको छ भने आर्थिक वर्ष २०८१/८२ मा २.१३ गुणा थियो। कम्पनीले व्यवसायबाट राम्रो नगद नाफा आर्जन गरेकाले यो सूचकमा उल्लेखनीय सुधार आएको हो।

कम्पनीले पूर्ण रूपमा छुट्टाछुट्टै भाग (सीकेडी) का रूपमा भारतबाट आयात गरिएका रोयल इन्फिल्ड मोटरसाइकलका पुर्जाहरू नेपालमै जडान गरी पूर्ण मोटरसाइकल उत्पादन गर्दै आएको छ। यी पुर्जाहरू भारतस्थित आइचर मोटर्सबाट आपूर्ति हुने गर्छन् भने कम्पनीको वीरगञ्ज नजिक भारत–नेपाल सीमासँगै रहेको जडान कारखानामा मोटरसाइकल तयार गरिन्छ। नेपालमै एसेम्बली गर्ने मोडल कम्पनीका लागि आयातित तयारी मोटरसाइकलको व्यापारभन्दा बढी लाभदायक बनेको छ। यसको मुख्य कारण सरकारले स्वदेशमा जडान उद्योगलाई प्रोत्साहनस्वरूप सीकेडी रूपमा आयात हुने मोटरसाइकलका पुर्जामा लाग्ने अन्तःशुल्कमा ५० प्रतिशत तथा भन्सार महसुलमा २५ प्रतिशत छुट दिएको हो। यही सुविधा तयार मोटरसाइकल आयातमा उपलब्ध नहुने भएकाले जडान उद्योगले प्रत्यक्ष रूपमा लागत घटाएर प्रतिस्पर्धात्मक लाभ लिन सकेका छन्।

विश्वव्यापी रूपमा स्थापित रोयल इन्फिल्ड ब्रान्डले मध्यम क्षमताका मोटरसाइकल बजारमा लामो समयदेखि आफ्नो छुट्टै पहिचान बनाउँदै आएको छ। विभिन्न अन्तर्राष्ट्रिय बजारमा निरन्तर विस्तार गरिरहेको यो ब्रान्डले नेपालमा पनि छोटो समयमै प्रिमियम दुई पाङ्ग्रे सवारीसाधनको बजारमा बलियो उपस्थिति र ग्राहकको विश्वास हासिल गरेको छ। विशेषगरी ३५० सीसी वा सोभन्दा माथिका इन्जिन क्षमता भएका मोटरसाइकलको बजारमा रोयल इन्फिल्डको स्थिर माग रहेकाले कम्पनीले आगामी दिनमा पनि यसबाट निरन्तर लाभ लिन सक्ने अपेक्षा गरिएको छ।

केयर रेटिङ्स नेपाल लिमिटेडले टीजी अटो ग्रुप प्रालिको अल्पकालीन बैंक सुविधा सम्बन्धी साख मूल्यांकन संशोधन गर्दै ‘ए थ्री प्लस’ प्रदान गरेको छ। यसअघि कम्पनीलाई ‘ए थ्री’ साख मूल्यांकन दिइएको थियो। कम्पनीको अल्पकालीन बैंक सुविधा रकम ७० करोड रुपैयाँबाट बढाएर १ अर्ब रुपैयाँ पुर्‍याइएको छ। यससँगै कुल बैंक सुविधा पनि ७० करोड रुपैयाँबाट वृद्धि भई १ अर्ब रुपैयाँ पुगेको छ।