अनिश्चितताको भुमरीमा शेयर बजारः सक्रिय लगानीकर्ता भागे, अझै छैन सुधार हुने संकेत !

काठमाडौँ । शेयर बजार पछिल्लो समय सुस्त गतिमा अघि बढिरहेको छ । कारोबार गतिविधि कायम रहे पनि बजारले स्पष्ट दिशा लिन नसक्दा लगानीकर्तामा अन्योल बढेको छ । नेप्सेमा बेलाबेला सुधारको संकेत देखिए पनि त्यसले स्थायी उकालो गति लिन सकेको छैन । जोखिम लिन लगानीकर्ता अझै हिच्किचाइरहेका छन् भने सक्रिय लगानीकर्ताको सहभागिता कमजोर हुँदा बजारमा अपेक्षित खरिद चाप बन्न सकेको छैन । बजार बढ्ने आधार खोजिरहेका लगानीकर्ता अहिले तत्काल नाफाभन्दा जोखिम व्यवस्थापनलाई प्राथमिकता दिन थालेका छन् ।

पूँजी बजारको विकास र लगानीकर्ताको विश्वास बढाउने विषयमा सरकार तथा नियामक निकायबाट सकारात्मक धारणा सार्वजनिक भइरहेका छन् । तर, त्यस्ता अभिव्यक्तिको प्रत्यक्ष प्रभाव भने शेयर बजारमा देखिन सकेको छैन । बजारका सहभागीले आश्वासनसँगै स्पष्ट नीति, दीर्घकालीन स्थिरता र व्यवहारमै कार्यान्वयन हुने बजारमैत्री निर्णयको अपेक्षा गरेका छन् । नीतिगत सुधारको चर्चा भइरहे पनि त्यसले लगानीकर्तालाई तत्काल ठूलो रकम बजारमा प्रवेश गराउने वातावरण सिर्जना गर्न सकेको छैन ।

अर्कोतर्फ, व्यवसायीमाथि भइरहेको सरकारी कारबाही तथा धरपकडका घटनाले पनि लगानीकर्ताको जोखिम धारणा प्रभावित बनाएको जानकारहरूको बुझाइ छ । व्यवसायिक वातावरणमा अनिश्चितता बढ्दा ठूला तथा संस्थागत लगानीकर्ता नयाँ लगानी विस्तार गर्नुभन्दा आफ्नो विद्यमान सम्पत्ति र पूँजी सुरक्षित राख्ने रणनीतिमा देखिएका छन् । अर्थतन्त्रका अन्य क्षेत्रमा देखिने अनिश्चितताको प्रभाव प्रत्यक्ष वा अप्रत्यक्ष रूपमा पूँजी बजारमा समेत पर्ने भएकाले लगानीकर्ता थप सतर्क बनेका छन् । बजारमा कारोबार भइरहेको भए पनि त्यसलाई बलियो लगानी विस्तारको संकेतका रूपमा लिन सकिने अवस्था अझै बनेको छैन ।

साना लगानीकर्ताको सहभागिता भने बजारमा निरन्तर देखिन्छ । तर, सीमित पूँजी, बढ्दो सतर्कता र बजारको स्पष्ट दिशा नदेखिएका कारण उनीहरूको सक्रियताले समग्र बजारमा बलियो माग सिर्जना गर्न सकेको छैन । बजार बढ्ने अपेक्षामा रहेका लगानीकर्ता सकारात्मक संकेतको प्रतीक्षामा छन् भने कतिपय लगानीकर्ता विगतका उतारचढावबाट सिक्दै हतारमा निर्णय लिनबाट पछि हटेका छन् । परिणामतः खरिदकर्ता र बिक्रीकर्ताबीचको मनोवैज्ञानिक दूरीले बजारलाई लामो समयदेखि स्थिर तथा अनिश्चित अवस्थामा राखेको छ ।

नेपाल स्टक एक्सचेञ्ज (नेप्से) ०.२६ अकंले घटेर २६२२.२२ बिन्दुमा कायम भएको छ । आज ३४६ कम्पनीको ९५ लाख ४ हजार कित्ता शेयर किनबेच हुँदा ३ अर्ब २९ करोड ५८ लाख रुपैयाँको कारोबार भएको हो ।

यसदिन ५ उपसूचकमा सामान्य सुधार देखिएको छ भने अन्य ८ उपसूचक राताम्य भएका छन् । आज सर्वाधिक व्यापार समूहको बढेको हो ।

बुधबार ११० कम्पनीको शेयर मूल्य बढेको छ भने १५० कम्पनीको घटेको छ । १८ कम्पनीको शेयर मूल्य भने स्थिर रहेको हो ।