काम गर्न विदेश जान पैसा छैन ? ग्लोबल आइएमई बैंकले दिनेछ डेढ लाख सम्म ऋण

काठमाडौं । तपाई पैसा कमाउन विदेश जाने सोच्नु भएको छ ? साथमा पैसा छैन कसरी जाने भनेर चिन्तित हुनुहुन्छ भने अब त्यस्तो चिन्ता ग्लोबल आईएमई बैंकले हटाउने भएको छ । नेपालकै सबैभन्दा ठूलो रेमिट्यान्स कम्पनी आइएमई ग्रुपको मुख्य लगानी रहेको ग्लोबल आइएमई बैंकले बैदेशिक रोजगारका लागि विदेश जान चाहने श्रमिकको लागि ‘ग्लोबल वैदेशिक रोजगार टेवा कर्जा’ कार्यक्रम ल्याएको छ ।

यस योजनाअन्तर्गत रोजगारका लागि विदेशिने श्रमिकलाई ५० हजारदेखि एक लाख ५० हजारसम्मको कर्जा बिनाधितो प्रदान गरिनेछ । यो कर्जा १२.८० प्रतिशतको स्थिर ब्याजदरमा पाइने बैंकले जनाएको छ । बैंकका अनुसार विदेश जान चाहने श्रमिकहरुलाई लक्षित गरेर यस्तो ऋण दिन लागिएको हो । बैंकले श्रम स्वीकृतिका आधारमा उक्त ऋण विदेश जानको लागि म्यानपावर कम्पनीलाई भुक्तानी गर्न र नेपालबाट विदेश उड्दा लाग्ने खर्च भुक्तानी गर्नको लागि दिनेछ ।

२१ वर्ष पूरा भएका र सरकारबाट श्रम स्विकृति प्राप्त गरी वैदेशिक रोजगारीमा जान लागेका व्यक्तिले ग्लोबल आइएमई बैंकमार्फत तथा आईएमई पे वालेटबाट आवेदन दिएमा कर्जा पाउने बैंकले जनाएको छ ।

बैंकले मलेसिया, कतार, साउदी अरब, ओमान, युएई, जापान, दक्षिण कोरिया लगायतका अन्य प्रचलित देशहरुमा वैदेशिक रोजगारीका लागि जानेहरुलाई प्राथमिकतामा राखि कर्जा दिनेछ । कर्जाको अवधि भने १८ महिनाको हुनेछ ।