बागमती प्रदेशद्वारा समस्याग्रस्त पाँच सहकारीका ऋणीलाई १५ दिनभित्र ऋण चुक्ता गर्न अल्टिमेटम
काठमाडौँ । बागमती प्रदेश सरकारले समस्याग्रस्त घोषणा गरिएका पाँच सहकारी संस्थाका ऋणीहरूलाई १५ दिनभित्र ऋण चुक्ता गर्न अन्तिम अल्टिमेटम दिएको छ। संस्कृति, पर्यटन तथा सहकारी मन्त्रालय अन्तर्गतको समस्याग्रस्त सहकारी व्यवस्थापन समितिको कार्यालयले एक सूचना जारी गर्दै सावाँ, ब्याज तथा हर्जाना बाँकी रहेका ऋणीहरूलाई ऋण तिर्न १५ दिनको समय दिएको हो।
समितिका अनुसार पटक–पटक फोन, वेबसाइट तथा राष्ट्रिय दैनिक पत्रपत्रिकामार्फत जानकारी गराउँदा पनि ऋण चुक्ता नगर्ने ऋणीहरूले बेवास्ता गरेपछि अन्तिम समयसीमा तोकिएको हो।
बागमती प्रदेश सरकारले सिभिल सेभिङ्ग एण्ड क्रेडिट को–अपरेटिभ, दर्शन बचत तथा ऋण सहकारी संस्था, सुमेरु बचत तथा ऋण सहकारी संस्था, लालीगुराँस बचत तथा ऋण सहकारी संस्था र नेशनल नमोबुद्ध बचत तथा ऋण सहकारी संस्थालाई समस्याग्रस्त घोषणा गरी सम्पत्ति तथा दायित्व फरफारक गर्न समस्याग्रस्त सहकारी व्यवस्थापन समितिलाई जिम्मेवारी दिएको छ।
सूचनामा तोकिएको १५ दिनको समयसीमाभित्र पनि ऋण नतिर्ने ऋणीहरूको नाम–नामेसी सार्वजनिक गरिने चेतावनी दिइएको छ। साथै, ऋणी, निजका परिवार तथा जमानीकर्ताको सम्पत्ति तथा बैंक खाता रोक्का गर्न सम्बन्धित निकायमा लेखी पठाइने उल्लेख छ।
त्यसैगरी, प्रदेश सहकारी ऐन २०७६ र नियमावली २०७६ अनुसार धितोमा राखिएको सम्पत्ति लिलाम बिक्री गरी ऋण असुल गरिने पनि सूचनामा स्पष्ट गरिएको छ।
प्रदेश सरकारले जारी गरेको सूचना ऋणी सदस्य मात्र नभई सम्बन्धित सहकारीका सञ्चालक, व्यवस्थापक, कर्मचारी तथा जमानीकर्ताहरूलाई समेत लक्षित गरिएको छ। ऋण तिर्न इच्छुक ऋणीहरूले काठमाडौँको अनामनगरस्थित समितिको कार्यालयमा सम्पर्क गरी आफ्नो हरहिसाब मिलाउन सक्ने व्यवस्था गरिएको छ।
