बैंकिङ कसुरमा दोषी ठहर दुई फरार अभियुक्त पक्राउ
काठमाडौँ । बैंकिङ कसुर मुद्दामा अदालतबाट दोषी ठहर भई फरार रहेका दुई व्यक्तिलाई प्रहरीले पक्राउ गरेको छ ।
पक्राउ पर्नेहरूमा तारकेश्वर नगरपालिका–१ साङ्ला बस्ने ४८ वर्षीय रोहितलाल श्रेष्ठ र काठमाडौं महानगरपालिका–२८ बस्ने, मोरङको विराटनगर महानगरपालिका–१० घर भएका मणी निरौला रहेका छन् ।
सर्वोच्च अदालतको २०८० असोज १५ गतेको फैसलाअनुसार बैंकिङ कसुर मुद्दामा १३ लाख ३३ हजार ३ सय ३३ रुपैयाँ जरिवाना र दुई वर्ष कैद सजाय ठहर भई फरार रहेका रोहितलाललाई केन्द्रीय अनुसन्धान ब्यूरोबाट खटिएको प्रहरीले शुक्रबार काठमाडौं महानगरपालिका–३ महाराजगञ्जबाट पक्राउ गरेको हो ।
यसैगरी उच्च अदालत पाटनको २०७९ असार १ गतेको फैसलाअनुसार सोही मुद्दामा २० लाख रुपैयाँ जरिवाना, ८० हजार रुपैयाँ पीडित राहत कोषमा जम्मा गराउने तथा ८ दिन कैद सजाय ठहर भई फरार रहेका मणीलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले बिहीबार काठमाडौं महानगरपालिका–१२ बाट पक्राउ गरेको प्रहरीले जनाएको छ ।
