एआई चिपको बढ्दो मागले दोस्रो त्रैमासिकमा सामसुङको नाफा ५८ अर्ब डलर पुग्ने

काठमाडौं । कृत्रिम बुद्धिमत्ता (एआई) प्रविधिको विस्तारसँगै उच्च क्षमताका मेमोरी चिपको माग तीव्र रूपमा बढेपछि दक्षिण कोरियाली प्रविधि कम्पनी सामसुङ इलेक्ट्रोनिक्सले आफ्नो इतिहासकै उत्कृष्ट त्रैमासिक नाफा हासिल गर्ने संकेत दिएको छ।

कम्पनीले मंगलबार सार्वजनिक गरेको प्रारम्भिक वित्तीय विवरणअनुसार सन् २०२६ को अप्रिलदेखि जुनसम्मको दोस्रो त्रैमासिक अवधिमा परिचालन नाफा करिब ८९४ खर्ब वोन (झन्डै ५८ अर्ब ४० करोड अमेरिकी डलर) पुग्ने अनुमान गरिएको छ। यो गत वर्षको सोही अवधिको तुलनामा करिब १९ गुणा अर्थात् १,८१० प्रतिशतले बढी हो।

यस अवधिमा कम्पनीको कुल राजस्व पनि उल्लेखनीय रूपमा विस्तार हुने देखिएको छ। सामसुङका अनुसार दोस्रो त्रैमासिक राजस्व करिब १,७१० खर्ब वोन पुग्ने प्रारम्भिक अनुमान छ, जुन अघिल्लो वर्षको तुलनामा १२९ प्रतिशतले बढी हो। कम्पनीले विस्तृत वित्तीय प्रतिवेदन भने यसै महिनाको अन्त्यतिर सार्वजनिक गर्ने जनाएको छ।

विश्लेषकहरूका अनुसार एआईका लागि निर्माण भइरहेका डाटा सेन्टरहरूमा प्रयोग हुने उच्च ब्यान्डविथ मेमोरी (एचबीएम) लगायत उन्नत मेमोरी चिपको मागले सामसुङको आम्दानीमा ठूलो योगदान पुर्‍याएको हो। विश्वकै सबैभन्दा ठूलो मेमोरी चिप उत्पादकका रूपमा रहेको सामसुङले एआई प्रविधिको तीव्र विस्तारबाट प्रत्यक्ष लाभ उठाइरहेको छ।

सेजोङ विश्वविद्यालयका व्यवसाय प्रशासनका प्राध्यापक किम डे–जोङका अनुसार कम्पनीले अनुमान गरेको परिचालन नाफा सामसुङकै इतिहासमा सबैभन्दा ठूलो त्रैमासिक उपलब्धि हुन सक्छ। उनका अनुसार यदि कम्पनीले यस्तो वृद्धि आगामी केही वर्षसम्म कायम राख्न सक्यो भने विश्व सेमिकन्डक्टर उद्योगमा यसको प्रतिस्पर्धात्मक क्षमता अझ सुदृढ हुनेछ। यद्यपि एआईसम्बन्धी चिपको वर्तमान उच्च माग कति समयसम्म कायम रहन्छ भन्ने विषय भविष्यको मुख्य चुनौती बन्न सक्ने उनले बताए। उनका अनुसार अर्को वर्षसम्म माग बलियो रहने सम्भावना भए पनि त्यसपछिको अवस्था स्पष्ट छैन।

सकारात्मक वित्तीय अनुमान सार्वजनिक भए पनि मंगलबार सियोलको सेयर बजारमा सामसुङको सेयर मूल्य करिब सात प्रतिशतले घटेको थियो। बजार विश्लेषकहरूले कोस्पी सूचकाङ्कमा आएको समग्र गिरावटका कारण लगानीकर्ताले नाफा सुरक्षित गर्ने प्रवृत्ति देखाएको बताएका छन्।

दक्षिण कोरियाको समाचार संस्था योन्हापका अनुसार सामसुङले सार्वजनिक गरेको प्रारम्भिक नाफा अनुमान बजार विश्लेषकहरूको औसत प्रक्षेपणभन्दा करिब ६.२ प्रतिशतले बढी रहेको छ।

एआई चिपको बढ्दो मागलाई ध्यानमा राख्दै सामसुङ र यसको प्रमुख प्रतिस्पर्धी एसके हाइनिक्सले दक्षिण कोरियामा ठूलो सेमिकन्डक्टर उत्पादन पूर्वाधार निर्माण गरिरहेका छन्। सार्वजनिक–निजी साझेदारीअन्तर्गत करिब ८ हजार खर्ब वोन बराबरको लगानीमा निर्माण भइरहेको उक्त परियोजनाले आगामी वर्षहरूमा उत्पादन क्षमता उल्लेखनीय रूपमा विस्तार गर्ने अपेक्षा गरिएको छ। यद्यपि परियोजना सम्पन्न भएपछि पनि हालको उच्च आम्दानीको स्तर कायम रहन्छ वा रहँदैन भन्ने विषयमा विश्लेषकहरू अझै सतर्क छन्।

केही अन्तर्राष्ट्रिय विश्लेषकहरूले भविष्यमा एआई पूर्वाधारमा हुने लगानी सुस्ताए मेमोरी चिप बजारमा दबाब आउन सक्ने चेतावनी दिएका छन्। तर बजार अनुसन्धान संस्था काउन्टरपोइन्ट रिसर्चका विश्लेषक एमएस ह्वाङले भने उत्पादकहरूको आपूर्ति क्षमता र ग्राहकको वास्तविक मागबीच अझै ठूलो अन्तर रहेकाले तत्काल ठूलो मन्दी आउने निष्कर्ष निकाल्न नमिल्ने बताएका छन्। उनका अनुसार केही परियोजना ढिलो हुन सक्छन्, तर त्यसलाई एआई उद्योगको समग्र लगानी घटेको संकेतका रूपमा व्याख्या गर्न उपयुक्त हुँदैन।

हाल अधिकांश चिप उत्पादकहरूले एआईसम्बन्धी उच्च मूल्यका उत्पादनलाई प्राथमिकता दिइरहेका छन्। यसको प्रभावस्वरूप स्मार्टफोन, ल्यापटप तथा अन्य उपभोक्ता विद्युतीय उपकरणमा प्रयोग हुने सामान्य मेमोरी चिपको उत्पादन घट्दै गएको छ, जसले ती उपकरणको उत्पादन लागत र बजार मूल्यमा समेत प्रभाव पार्न थालेको विश्लेषण गरिएको छ।