हुन्डाई आयोनिक ५ र किया ईभी ६ मा ब्याट्री सर्ट सर्किटको खतरा
काठमाडौँ । हुन्डाई र किया ब्रान्डका सवारी साधनमा आगलागीको जोखिम रहेको खुलेको छ । विद्युतीय सवारीसाधनमा प्रयोग हुने उच्च भोल्टेज ब्याट्रीमा देखिएको गम्भीर गुणस्तरीय त्रुटिका कारण आगलागीको जोखिम बढेपछि दक्षिण कोरियाली सवारी निर्माता हुन्डाई र कियाले आफ्ना केही विद्युतीय गाडी तत्काल फिर्ता बोलाएका हुन् ।
दैनिक प्रयोगमा रहेका सवारीसाधनका लागि ब्याट्रीमा आगलागी हुनु सबैभन्दा गम्भीर जोखिममध्ये एक मानिने भएकाले प्रभावित गाडीका धनीलाई मर्मत सम्पन्न नहुन्जेलसम्म विशेष सावधानी अपनाउन आग्रह गरिएको छ । दुवै कम्पनीले संयुक्त रूपमा १४ वटा विद्युतीय गाडी फिर्ता बोलाएका हुन् । हुन्डाईका ६ वटा र कियाका ८ वटा गाडीमा उच्च भोल्टेज ब्याट्रीभित्र रहेका इलेक्ट्रोडहरू उत्पादनका क्रममा ठीकसँग नमिलेको पाइएको छ । यसले ब्याट्रीभित्र सर्ट सर्किट हुन सक्ने र गाडी चलिरहेको वा पार्किङमा रहेको जुनसुकै अवस्थामा पनि आगलागी हुन सक्ने जोखिम रहेको कम्पनीहरूले चेतावनी दिएका छन् ।
हुन्डाईका सन् २०२३ र २०२४ मोडेल वर्षका ६ वटा आयोनिक–५ यस समस्याबाट प्रभावित भएका छन् । कम्पनीले गाडीधनीलाई मर्मत सम्पन्न नहुन्जेल गाडी घर, ग्यारेज वा अन्य संरचनाबाट टाढा खुला स्थानमा पार्क गर्न, ब्याट्रीको चार्ज ८० प्रतिशतभन्दा माथि नपु¥याउन तथा आवश्यक सावधानी अपनाउन निर्देशन दिएको छ । अधिकृत सेवा केन्द्रमार्फत उच्च भोल्टेज ब्याट्री प्रणाली पूर्ण रूपमा निःशुल्क परिवर्तन गरिने कम्पनीले जनाएको छ ।
त्यस्तै, कियाले सन् २०२२ देखि २०२४ मोडेल वर्षसम्मका ७ वटा ईभी–६ र एउटा सन् २०२४ मोडेल वर्षको ईभी–९ गरी कुल ८ वटा गाडी फिर्ता बोलाएको छ । यी गाडीमा पनि उही प्रकारको उत्पादनसम्बन्धी त्रुटि भेटिएको कम्पनीले जनाएको छ । प्रभावित गाडीधनीलाई पनि गाडी खुला स्थानमा पार्क गर्न, अन्य सवारीसाधन तथा भवनबाट टाढा राख्न र ब्याट्रीको चार्ज ८० प्रतिशतभन्दा बढी नगर्न निर्देशन दिइएको छ । अधिकृत सेवा केन्द्रले उच्च भोल्टेज ब्याट्री प्रणाली निःशुल्क परिवर्तन गर्नेछ ।
अमेरिकी राष्ट्रिय राजमार्ग यातायात सुरक्षा प्रशासनमा दर्ता गरिएका विवरणअनुसार उच्च भोल्टेज ब्याट्री उत्पादन गर्ने कम्पनी एसके अन कम्पनीले उत्पादन प्रक्रियामा भएको गुणस्तरीय कमजोरीका कारण ब्याट्रीभित्रका इलेक्ट्रोडहरू ठीकसँग नमिलेको स्वीकार गरेको छ । यही उत्पादन त्रुटिका कारण सामान्य रूपमा गाडी चलाउँदा वा चार्ज गर्दा पनि ब्याट्रीभित्र सर्ट सर्किट हुन सक्ने र त्यसबाट आगलागी हुन सक्ने जोखिम रहेको बताइएको छ ।
