मुग्लिङ–नारायणगढ सडकमा दुई बस र ट्रक ठोक्किंदा ३३ जना घाइते
काठमाडौं । चितवनको इच्छाकामना गाउँपालिका–६ जलबिरे नजिक मुग्लिङ–नारायणगढ सडकखण्डमा आइतबार बिहान दुई बस र एक ट्रक एकापसमा ठोक्किंदा करिब ३३ जना यात्रु घाइते भएका छन्।
बिहान करिब ७ः१० बजे काठमाडौंबाट दाङतर्फ जाँदै गरेको लु.प्र.०३–००१ ख ०५०५ नम्बरको बस, सर्लाहीबाट काठमाडौंतर्फ आउँदै गरेको म.प्र.०३–००२ ख ७३२ नम्बरको बस तथा सोही दिशाबाट पछाडि आउँदै गरेको बा.प्र.०३–००१ ख १६७१ नम्बरको ट्रक एकापसमा ठोक्किंदा दुर्घटना भएको हो।
दुर्घटनालगत्तै सुरक्षाकर्मी र स्थानीयको सहयोगमा घाइतेहरूको उद्धार गरी एम्बुलेन्समार्फत उपचारका लागि भरतपुर पठाइएको छ। दुर्घटनापछि केही समय अवरुद्ध बनेको मुग्लिङ–नारायणगढ सडकखण्डमा दुर्घटनाग्रस्त सवारीसाधन हटाइएपछि दुवैतर्फको सवारी आवागमन पुनः सुचारु भएको प्रहरीले जनाएको छ।
