एनपीएल तेस्रो संस्करण सुरु हुँदै, लुम्बिनी र सुदूरपश्चिम भिड्ने
काठमाडौं । नेपाल प्रिमियर लिग (एनपीएल) क्रिकेटको तेस्रो संस्करण आज (सोमबार) देखि सुरु हुँदैछ । कीर्तिपुरस्थित त्रिवि अन्तर्राष्ट्रिय क्रिकेट मैदानमा आयोजना हुने प्रतियोगिताको उद्घाटन खेलमा साविक विजेता लुम्बिनी लायन्स र उपविजेता सुदूरपश्चिम रोयल्स भिड्दैछन् ।
नेपाल क्रिकेट संघ (क्यान) को आयोजनामा हुने प्रतियोगितामा आठ फ्रेन्चाइज टोलीले उपाधिका लागि प्रतिस्पर्धा गर्नेछन् । लुम्बिनी लायन्स र सुदूरपश्चिम रोयल्ससँगै विराटनगर किंग्स, काठमाडौं गोर्खाज, पोखरा एभेन्जर्स, कर्णाली याक्स, चितवन राइनोज र जनकपुर बोल्ट्स प्रतियोगितामा सहभागी छन् ।
तेस्रो संस्करणको विजेताले एक करोड ५० लाख रुपैयाँ पुरस्कार प्राप्त गर्नेछ । त्यस्तै उपविजेताले ८० लाख, तेस्रो हुने टोलीले ४० लाख र चौथो हुने टोलीले ३० लाख रुपैयाँ पाउनेछन् । अघिल्लो संस्करणको तुलनामा यसपटक पुरस्कार राशि बढाइएको हो ।
यस संस्करणमा पहिलोपटक डिसिजन रिभ्यु सिस्टम (डीआरएस) प्रयोग गरिनेछ । अम्पायरको निर्णयमा असहमति भएमा टोलीले पुनरावलोकनको माग गर्न सक्नेछन् । त्यस्तै अन्तर्राष्ट्रिय क्रिकेट परिषद् (आईसीसी) को मान्यतासमेत प्राप्त गरेकाले प्रतियोगिताले नेपाली क्रिकेटको अन्तर्राष्ट्रिय पहिचान विस्तार गर्ने अपेक्षा गरिएको छ ।
प्रतियोगिताबाट करिब एक अर्ब ५० करोड रुपैयाँ बराबरको आर्थिक कारोबार हुने अनुमान क्यानले गरेको छ । टिकट बिक्री, प्रायोजन तथा प्रसारण अधिकारबाट आम्दानी बढ्ने अपेक्षा गरिएको छ । एनपीएलको तेस्रो संस्करण कात्तिक १० देखि मंसिर ५ गतेसम्म सञ्चालन हुनेछ । लिग चरणका खेलपछि शीर्ष चार टोली प्लेअफमा प्रवेश गर्नेछन् । प्रतियोगिताको फाइनल खेल मंसिर ५ गते हुनेछ ।
