गरिमा विकास बैंकको नाफा ८.४६ प्रतिशत बढ्यो, अन्य सूचकमा लोभलाग्दो ग्रोथ
काठमाडौं । गरिमा विकास बैंक लिमिटेडको गत आवको ६ महीनाको तुलनामा चालू आवको सोही अवधिमा खुद नाफा ८.४६ प्रतिशतले वृद्धि भएको छ। बैंकको खुद नाफा ५५ करोड ५८ लाख रुपैयाँबाट बढेर ६० करोड ३८ लाख रुपैयाँ पुगेको हो।
त्यस्तै समीक्षा अवधिमा बैंकको खुद ब्याज आम्दानी १ अर्ब ८४ करोड ४६ लाख रुपैयाँबाट सामान्य बढेर १ अर्ब ८८ करोड ४ लाख रुपैयाँ पुगेको छ भने खुद फी तथा कमिशन आम्दानी २३ करोड ८० लाख रुपैयाँबाट बढेर २७ करोड ७४ लाख रुपैयाँ पुगेको छ।
त्यसैगरी बैंकको कुल सञ्चालन आम्दानी २ अर्ब १० करोड ८९ लाख रुपैयाँबाट बढेर २ अर्ब २३ करोड १३ लाख रुपैयाँ पुगेसँगै सञ्चालन नाफा पनि ७८ करोड ५० लाख रुपैयाँबाट वृद्धि भई ९० करोड ६८ लाख रुपैयाँ पुगेको छ। बैंकको वितरणयोग्य मुनाफा १४ करोड ७६ लाख रुपैयाँबाट वृद्धि भई ३० करोड ८४ लाख रुपैयाँ पुगेको छ।
त्यस्तै बैंकको प्रतिशेयर आम्दानी १९.३४ रुपैयाँबाट बढेर २१.१० रुपैयाँ पुगेको छ भने खराब कर्जा (एनपीएल) ४.७२ प्रतिशतबाट सामान्य बढेर ४.७८ प्रतिशत पुगेको छ। बैंकको प्रतिशेयर नेटवर्थ १५९.५९ रुपैयाँ रहेको छ भने मूल्य आम्दानी अनुपात १८.५३ गुणा रहेको छ।
चुक्ता पूँजी ६ अर्ब २ करोड रुपैयाँ रहेको यस बैंकको जगेडा कोषमा ३० करोड रुपैयाँ र रिजर्भमा ३ अर्ब २८ करोड रुपैयाँ सञ्चित रहेको छ। बैंकले ७२ अर्ब ९४ करोड रुपैयाँ कर्जा प्रवाह गरी ९१ अर्ब २७ करोड रुपैयाँ निक्षेप संकलन गरेको छ।
