नेप्सेमा झिनो अंकको गिरावट, ६८ कम्पनीको शेयरमूल्य बढ्दा १४५ को घट्यो
काठमाडौं । साता कारोबारको दोस्रो दिन नेप्सेमा झिनो अंकको गिरावट आएको छ । आज ६८ कम्पनीको शेयरमूल्य बढ्दा १४५ कम्पनीको को शेयरमूल्य घटेको छ भने ११ कम्पनीको शेयरमूल्यमा हलचल आएको छैन ।
सोमबार नेप्से परिसूचक ३.६१ अंकले घटेर २०७७ को विन्दुमा कायम भएको छ । नेप्सेमा सूचीकृत २७९ कम्पनीहरुको ५४ लाख १७ हजार कित्ता शेयर किनबेच हुँदा २ अर्ब ९ करोड १३ लाख ९० हजारको कारोबार भएको छ ।
नेप्सेमा गिरावट आएसँगै अधिकांश उपसूचकहरुमा पनि रातो पोतिएको छ । सोमबार ८ उपसूचकमा रातो पोतिदा ५ उपसूचकमा भने हरियाली छाएको छ ।
सोमबार हाइड्रोपावर र होटल तथा पर्यटन उपसूचक सर्वाधिक क्रमशः १.५९ र १.५८ प्रतिशतले घटेका छन् । ट्रेडिङ उपसूचक १.४१ प्रतिशतले घटेको छ ।
त्यस्तै, उत्पादन तथा प्रशोधन उपसूचक सर्वाधिक ०.६५ प्रतिशतले बढेको छ भने दोस्रोमा म्युचुअल फण्ड उपसूचक ०.५५ प्रतिशतले बढेको छ ।
