मनकामना इन्जिनियरिङ्गको पहिलो चरणको आईपीओ बाँडफाँड सम्पन्न, यसरी हेर्नुस् नतिजा
काठमाडौं । मनकामना इन्जिनियरिङ्ग हाइड्रोपावरको पहिलो चरणमा निष्काशन गरेको आईपीओ बाँडफाँड सम्पन्न भएको छ ।
बिक्री प्रबन्धक बिओके क्यापिटलले आज योजना प्रभावित दोलखा जिल्लाका स्थानीय र श्रम स्वीकृति लिई विदेशमा रहेका नेपाली नागरिकको लागि निष्काशन गरिएको शेयर आईपीओ बाँडफाँड गरेको हो ।
कम्पनीले आयोजना प्रभावित दोलखा जिल्लाका आयोजना प्रभावितलाई ८ लाख कित्ता शेयर निष्काशन गरेको थियो । यस निष्काशनमा ७ सय २२ जनाको आवेदन परेको छ । ७ सय २२ जना आवेदकले आफुले माग गरे बमोजिम शेयर पाएका छन् । यस हिसाबमा कुल १ लाख ८३ हजार ३ सय ८० कित्ता शेयर बाँडफाँड भएको छ । स्थानीयले खरिद नगरेको ६ लाख १६ हजार ६ सय २० कित्ता सर्वसाधारणमा निष्काशन हुने छ ।
त्यस्तै, कम्पनीले श्रम स्वीकृति लिई विदेशमा रहेका नेपाली नागरिकलाई २ लाख कित्ता शेयर निष्काशन गरेको थियो। यस निष्काशनमा कुल २५ हजार २ सय १९ जनाको आवेदन परेकोमा १ जनाको आवेदन रद्द भई २५ हजार २ सय १८ जनाको आवेदन मात्र योग्य भएको छ । सबै योग्य आवेदकलाई न्युनतम १० कित्ता शेयर बाँडफाँड गर्न नपुग्ने भएकोले गोलाप्रथाबाट शेयर बाँडफाँड गरिएको छ । जसमा गोलाप्रथाबाट २० हजार जनाले १० कितात्को दरले शेयर पाएका छन् । बाँकि आवेदक भने हात खाली भएका छन् । शेयर नपरेका आवेदकले सर्वसाधारणलाई शेयर निष्काशन गर्दाको समयमा आवेदन दिन सक्ने छन् ।
आईपीओको नतिजा बिक्रि प्रबन्धक बिओके क्यापिटलको वेबसाइट, सिडीएससीको मेरोशेयरको वेबसाइट र सिडीएसले आईपीओको लागि संचालन गरेको वेबसाइटबाट हेर्न सकिन्छ ।
