शेयर बजारमा चलखेल रोक्न र पारदर्शिता कायम गर्न अर्थसमितिको पाँचबुँदे निर्देशन
काठमाडौँ । शेयर बजारमा देखिएका समस्या समाधान गर्दै पुँजी बजारलाई व्यवस्थित, पारदर्शी र आधुनिक बनाउन प्रतिनिधिसभाअन्तर्गतको अर्थ समितिले पाँचबुँदे निर्देशन दिएको छ।
समितिले पुँजी बजारको विकास र आधुनिकीकरणका लागि सम्बन्धित निकायलाई आवश्यक पहल गर्न निर्देशन दिएको हो। बजारमा हुने अस्वाभाविक चलखेल तथा कृत्रिम उतारचढाव नियन्त्रण गर्न नेपाल धितोपत्र बोर्ड (सेबोन) र नेपाल स्टक एक्सचेञ्ज (नेप्से) लाई प्रभावकारी अनुगमन तथा कारबाही गर्न निर्देशन दिइएको छ।
त्यस्तै, शेयर बजारमा चलखेल गर्ने तथा बजारलाई प्रभावित पार्ने कम्पनी वा व्यक्तिमाथि प्रचलित कानुनबमोजिम कडा कारबाही गर्न समितिले सम्बन्धित निकायलाई निर्देशन दिएको छ।
समितिले नेपाल स्टक एक्सचेञ्ज (नेप्से) र सिडिएस एन्ड क्लियरिङ लिमिटेड (सीडीएससी) को प्रमुख कार्यकारी अधिकृत पद लामो समयदेखि रिक्त रहेको हुँदा बजार व्यवस्थापन तथा सञ्चालनमा असर पर्न सक्ने भन्दै पदपूर्तिका लागि नेपाल सरकारलाई आवश्यक प्रक्रिया अघि बढाउन निर्देशन दिइएको छ।
